Nets gipakaging ang Warriors; Nuggets, Grizzlies nangahagba

CEBU, Philippines — Luyo sa pagpangu ni Kyrie Irving nga mipabuhagay og 38 puntos, gitumba sa Brooklyn Nets ang defending NBA champion Golden State Warriors, 120-116, kagahapon didto sa Chase Center sa San Francisco, California.

Mikuha sab og atensiyon si Royce O'Neale, kansang krusyal nga tres sa pinal nga 28.5 segundos maoy nakapalabaw sa Nets sa hingpit.

Human niini, si Irving milansang og duha ka free throws aron silyohan ang daog sa Nets.

"Total team effort," dason pa ni Irving human gikastigo sa Nets ang Warriors, 27-10, sa katapusang siyete minutos sa duwa.

Sa laing bahin, ang top 2 teams sa Western Conference nga Denver Nuggets ug Memphis Grizzlies paregong nangahagba. Ang Nuggets giparotan sa Oklahoma City Thunder, 99-101, samtang ang Grizzlies gibihag sa Phoenix Suns, 110-112.

Si Shai Gilgeous-Alexander miratsada og 34 puntos sa dihang giputol sa Thunder ang siyam ka sagunson nga daog sa Nuggets.

Wala hinoon makaduwa ang bitoon sa Nuggets nga si Nikola Jokic kay dunay angol.

Didto sa Phoenix, si Mikal Bridges maoy bida sa Suns bitbit ang 24 puntos samtang si Chris Paul midonar og 22 puntos ug 11 ka assists.

Si Ja Morant mi-iskor og 27 samtang si Desmond Bane midugang og 24 puntos alang sa Grizzlies nga nasagunsonan og duha ka pilde human miposte og 11 ka sunod-sunod nga daog.

Sa laing resulta, si Kawhi Leonard mikolekta og 30 puntos ug siyam ka rebounds sa dihang giwani sa LA Clippers si Luka Doncic ug ang Dallas Mavericks, 112-98.

Si Doncic mipupo og 29 puntos ug 10 ka rebounds alang sa Mavs apan mipasud lamang og siyam sa 21 niya ka itsa. Ang Mavs napukan sa ikaunom nga higayon sa miagi nilang walo ka duwa.