Ika-7 PBA crown target ni Brownlee

MANILA, Philippines — Ang kanyang pang-pitong PBA Finals, target ang ika-pitong korona ang pakay ni three-time Best Import Justin Brownlee sa kanyang muling pagbandera sa nagdedepensang Barangay Ginebra sa 2023 PBA Governors’ Cup.

Sa katatapos na 2022 PBA Commissioner’s Cup ay nagposte si Brownlee ng mga averages na 28 points, 10.2 rebounds, 6.8 assists, 1.7 blocks at 1.2 steals para sa paghahari ng Gin Kings.

Muling dadalhin ng naturalized guard ang nasa­bing mga numero sa kampanya ng Ginebra sa season-ending conference na bubuksan sa Linggo sa Philsports Arena sa Pasig City.

Unang naglaro at nagwagi ng PBA crown ang 34-anyos na si Brownlee para sa Gin Kings noong 2016 Governors’ Cup bilang kapalit ni injured Paul Harris.

Magkakaroon ang Ginebra ng isang two-week break bago sumalang sa hardcourt sa Pebrero 5 laban sa Rain or Shine sa Smart Araneta Coliseum.

Muli ring maglalaro sa PBA ang mga balik-imports na sina KJ McDaniels (Meralco), Shawn Glover (Blackwater), Du’Vaughn Maxwell (Phoenix), Michael Qualls (Rain or Shine) at Cameron Clark (San Miguel).

Gagawa naman ng ingay ang mga baguhang sina Jonathon Simmons (NLEX), Jordan Williams (Terrafirma), Marcus Wea­thers (NorthPort), Ethan Rusbatch (Converge), Erik McCree (Magnolia) at Jalen Hudson (TNT Tropang Giga).