Jokic misalida na sab sa Nuggets

CEBU, Philippines — Si Nikola Jokic mirehistro sa ika-13 niyang triple-double ning season sa dihang ang Denver Nuggets nagasugakod sa gipabutong 44 puntos ni Damian Lillard aron paludhon ang Portland Trail Blazers, 122-113, sa NBA kagahapon didto sa Ball Arena sa Denver, Colorado.

Ang two-time reigning MVP gikan sa Serbia mikolekta og 36 puntos, 12 ka rebounds ug 10 ka assists aron tabangan ang Nuggets pagkadlit sa ikapito nilang sagunson nga daog. 

Si Michael Porter Jr. midugang og 23 puntos, si Jamal Murray mi-iskor og 17, samtang sila si Bruce Brown ug Aaron Gordon nagkumboya'g 23 puntos alang sa Nuggets nga wala na molingi pa sukad miposte og 73-66 nga labaw sa halftime.

Sa laing duwa, ang Brooklyn Nets nasugamak sa ikatulo nilang sunod-sunod nga pilde human gibihag sa San Antonio Spurs, 106-98.

Napaingan og maayo ang Nets gumikan kay gawas nga wala si Kevin Durant, wala sab makaduwa si Kyrie Irving tungod kay dunay angol.

Si Keldon Johnson mihipos og 36 puntos ug 11 ka rebounds alang Spurs, nga 14 pa lamang ang daog uban ang 31 ka pilde.

Samtang nagkagidlay ang Nets nga wala si Durant, hapsay ang dagan sa Milwaukee Bucks bisan og wala ang alas nilang si Giannis Antetokounmpo human ilang gipayaka ang Toronto Raptors, 130-122.

Si Jrue Holiday na sab maoy bida sa Bucks bitbit ang 37 puntos, unom ka rebounds ug pito ka assists.

Didto sa Los Angeles, si Joel Embiid mipaulbo og 41 puntos sa dihang gipiog sa Philadelphia 76ers ang Clippers, 120-110, aron pagpabilin sa ikatulong puwesto sa Eastern Conference uban ang 28-16 nga baraha.