GSI, TMV nagmadaugon sa 1st Zynergia Cup

CEBU, Philippines — Ang Goutsource Solutions International (GSI) walay kukaluoy nga milubong Domelsky Water Refilling Warriors, 73-50 sa nagpadayong aksiyon sa 1st Zynergia Cup 2023 niadtong Domingo diha sa CEC gym.

Gipangulohan ni Francis Mateo ang daog pinaagi sa iyang 22 puntos, unom ka rebounds ug lima assists nga nakapahimo kaniyang best player of the game.

Sa maong kadaogan, ang GSI ni Ivan Llesol nagbitbit na karon og 2-2 nga baraha sa maong liga nga giorganisar sa Brothers Ballclub. Sila si Darwin Rollon ug Derrel Rollon mitampo’g 11 puntos matag usa sa GSI , kansang ang double digits nga labaw namintinar hangtod sa katapusang gutlo sa duwa.

Ang Domelsky nga nangiwit sa standing sa ilang 0-4 win-loss record gipangulohan mismo sa ilang team manager Melchor Almonicar nga mikandos og 22 puntos, gisundan ni James Basan sa iyang 13 puntos.

Sa laing aksiyon, ang TMV Solid Ground Construction Engineering Building Finishing, miiskor sab sa ilang ikaduhang daog human gipilde ang JJS Electrical Supply, 77-73.

Ang best player nga si Jan Sachary Bauntad ang topscorer sa TMV nga mipabuhagay og 22 puntos. Si Charlee Lumasag miamot og 17 puntos, samtang sila si Ernie Ygot ug Francis Bauntad nagtampohay og 11 puntos sa TMV ni Theresa Villarino nga nagtangag na karon og 2-2 record.

Nangulo 2-1 nga JJS ni team manager Joeffrey Banaag mao si Joshua Banaag nga mirehistro og 20 puntos, gisundan ni Jessie Sanchez nga adunay 14 puntos ug Melvin Morfe sa iyang 11 puntos.