Donling nagsolo na sa liderato sa 1st Zynergia Cup 

CEBU, Philippines — Nagsolo na sa unang dapit sa standing ang Donling Aircon and Refrigeration Services human midaog sa JMD Automotive, 59-51 sa 1st Zynergia Cup 2023 niadtong Domingo diha sa CEC gym.

Sa kasamtangan ang Donling ni Romeo Quilaton aduna na’y 3-0 records ning maong liga nga hiniusang giorganisar sa Brothers Ballclub.

Si Roldan Daug nga daku’g natampo sa kadaogan maoy topscorer ug best player of the game human nirehistro og 16 puntos, walo ka rebounds ug tulo ka assists.

Sila si Nino Secret ug Voltaire Lumoya mitampo’g 13 puntos matag usa, samtang si Angelo Ponce miamot og 11 puntos.

Sila lang si Jerico Rosales ug Joemarie Arupo ang nihimo’g double figures sa JMD ni Gerald Dilao sa ilang 11 ug 10 puntos.

Sa laing duwa, ang Jot Trucking mihakot sa ilang ikaduhang daog pinaagi sa pagpilde sa Violex Trading, 67-56.

Ang 2-2 nga Jot Trucking ni Jeffrey Tagacanao gipangulohan sa best player niining si Arjay Mendoza, kinsa miariya’g 16 puntos, siyam ka rebounds ug tulo ka assists.

Ang Violex gipangulohan mismo sa ilang team manager CJ Cardenas nga miposte og 22 puntos, gisundan sa iyang igsuong si Dan Cardenas nga adunay 17 puntos.

Sa maong kapildihan, ang Violex midailos sa ikaduhang dapit bitbit ang 3-1 win-loss record.