Ginebra may dapat gawin at ipagdasal para sa No. 2 berth
MANILA, Philippines — Bukod sa kanilang panalo sa Converge bukas ay kailangan ding ipagdasal ng Barangay Ginebra na matalo ang Magnolia sa Rain or Shine sa Biyernes.
Ito ay para maagaw ng Gin Kings ang No. 2 spot sa eight-team quarterfinal round ng 2022 PBA Commissioner’s Cup.
“Right now, we don’t control our destiny,” ani Gin Kings’ coach Tim Cone matapos talunin ang NorthPort Batang Pier, 122-105, noong Linggo. “We have to have Magnolia lose against Rain or Shine, we have to win for us to get into the top two.”
Nauna nang inangkin ng guest team na Bay Area ang No. 1 berth mula sa bitbit na 10-2 record kasunod ang Magnolia (9-2), Ginebra (8-3), Converge (8-3), San Miguel (6-5), NorthPort (6-6), Phoenix (6-6), Rain or Shine (5-6), Meralco (4-6), NLEX (4-7), TNT Tropang Giga (4-8), Blackwater (3-9) at Terrafirma (1-11).
Wala na sa kontensyon ang Tropang Giga, Bossing at Dyip.
Ang No.1 at No. 2 teams ang magkakaroon ng ‘twice-to-beat’ advantage sa quarterfinals kontra sa No. 8 at No. 7 squads, ayon sa pagkakasunod.
Maglalaban naman sa parehong best-of-three series ang No. 3 at No. 6 at ang No. 4 at No. 5 teams.
Kung mananalo ang Gin Kings sa FiberXers kasunod ang kabiguan ng Hotshots sa Elasto Painters ay magtatabla sila sa 9-3 karta.
Maaagaw ng Ginebra ang No. 2 ticket dahil sa winner-over-the-other rule mula sa kanilang 103-97 pananaig sa Magnolia sa ‘Manila Clasico’ noong Oktubre 23.
Kaya gagawin ng Hotshots ang lahat para manalo sa Biyernes para opisyal nang angkinin ang second spot.
- Latest