SHAABAA Season 25: Carampatana Food, Cebu Landmasters gikoronahang kampiyon
CEBU, Philippines — Ang Carampatana Food Corp. Batch 2012 ug ang Cebu Landmasters Batch 2003 miwani sa ilang mga karibal sa tinagakay nga mga duwa aron paglugwa nga kampiyon sa ilang dibisyon sa Sacred Heart Ateneo Alumni Basketball Athletic Association (SHAABAA) Season 25 niadtong weekend didto sa Magis Eagles Arena sa Barangay Canduman, dakbayan sa Mandaue.
Ang Batch 2012 nagsandig sa pagkamabayanihon ni Rev-Rev Diputado aron pakgangon ang Asian Orthopedics Batch 2014, 74-70, sa knockout game sa ilang best-of-three finals aron langkaton ang titulo sa Division C.
Si Diputado mipatuasik og 22 puntos apil na niini ang krusyal niyang layup gikan sa maanindot nga assist ni Dave Wilson Yu sa pinal nga nuybe segundos nga maoy nagsilyo sa kulbahinam nga kalamposan sa Batch 2012.
Si Diputado, nga duna say lima ka rebounds, upat ka assists ug duha ka steals, gipaluyohan nilang Yu ug Julius Cadavis nga mihipos og 14 puntos matag usa ug ni Mavii Suarez nga mitali og 13 puntos. Sila si Lucky Ecarma ug Zach Huang nagkumboya'g 42 puntos apan nakawang ang ilang paningkamot sa habig sa Batch 2014.
Sa laing bahin, si Daryle Tan mipupo og 21 puntos, si Justin Ross Huang mi-iskor og 16 samtang si Moncrief Rogado miamot og 13 puntos sa dihang gipayaka sa Batch 2003 ang Suprea Ready Mixed Concrete Batch 2011, 72-66, aron birahon ang korona sa Division B.
Si Kiefer Lim mikimada og 20 puntos samtang si Franz Pacheco mipupo og 15 puntos sa pilderong Batch 2011.
Sa laing resulta, si Sergs Al Gobui mirehistro og 14 puntos sa dihang giunhan sa Xchange Forex Batch 2000 ang Magis Medical Fund Batch 1997, 57-50, sa ilang best-of-three series alang sa kampiyonato sa Division A.
- Latest
