Blackwater bagsak sa depensa ng TNT

MANILA, Philippines — Pinuwersa ng TNT Tropang Giga ang Blackwater sa 31 turnovers para sa 108-98 tagumpay sa 2022 PBA Commissioner’s Cup kahapon sa Philsports Arena sa Pasig City.

Nagrehistro si import Cameron Oliver ng 38 points at 10 rebounds at umiskor si Mikey Williams ng 28 markers para sa ikatlong panalo ng Tropang Giga sa limang laban.

May tig-11 points naman sina RR Pogoy at Calvin Oftana.

Bigo ang Bossing na maitala ang dalawang sunod na ratsada at nadulas sa 3-4 record.

“That’s good that we were able to force 31 turnovers but I think Blackwater shot very well,” wika ni TNT coach Chot Reyes sa Blackwater na nakahugot kay import Cameron Krutwig ng 25 points, 12 rebounds, 4 assists at 3 steals. “I think we played better defense now than the last game.”

Nagdagdag sina Baser Amer, Rey Suerte, Ato Ular, Gab Banal at Rashwan McCarthy ng 16, 15, 13, 12 at 11 markers, ayon sa pagkakasunod, para sa Bossing.

Mula sa 53-51 abante sa halftime ay bumandera sina Oliver, Williams at Pogoy sa paghuhulog ng 15-1 bomba para sa 76-65 kalamangan ng TNT sa 4:19 minuto ng third quarter.

Ang alley-oop dunk ni Oliver mula sa pasa ni Poy Erram ang nagbaon sa Blackwater sa 92-78 sa 7:58 minuto ng fourth period.

Ilang beses nagpilit makalapit ang Bossing, ngunit lalo pa silang naiwanan sa 104-89 agwat matapos ang drive ni Oftana sa huling 1:41 minuto ng sagupaan.