Cebu Landmasters 2003 7-0 na SHAABAA
CEBU, Philippines — Ang Cebu Landmasters Batch 2003 milatos sa Bad Boys Wingz Batch 2007, 69-51, aron pagpabiling way pilde sa Sacred Heart Ateneo Alumni Basketball Athletic Association (SHAABAA) Season 25 niadtong Miyerkules didto sa Magis Eagles Arena sa Barangay Canduman, dakbayan sa Mandaue.
Si Daryle Tan mikadlit og 22 puntos ug 11 ka rebounds samtang si Ervin Lopena mihipos og 19 puntos, 12 ka rebounds ug duha ka assists sa dihang gipahugtan sa Batch 2003 ang ilang pagkupot sa solong liderato sa Division B bitbit ang perpektong 7-0 record.
Mipabuhagay si Franz Cimafranca og double-double nga 22 puntos ug 14 puntos apan way nahimo gumikan kay ang Batch 2007 natagak sa 4-3.
Sa laing duwa sa Division B, si Christopher Consunji way sipyat sa unom niya ka 3-pointers sa iyang 35 puntos aron pangulohan ang Radar Tires Batch 2004 ngadto sa 92-69 nga paglampaso sa Marjaztin Glass Trading & Construction Batch 2008.
Wala sab magpa-alkansi si Franco Te nga mibugha og triple-double uban ang 23 puntos, 16 ka rebounds, ug 10 ka assists aron tabangan ang Batch 2004 nga buhion ang ilang paglaum s aplayoffs bitbit ang 3-4 nga baraha.
Sa Division C, si Rey Marcus Fuentes mipabuto og 32 puntos, 15 ka rebounds ug duha ka assists aron agakon ang Casa Mira 2021 batok sa Batch 2019, 83-81, samtang sila si Mitch Ivan Almodal ug Romeo Angelo Jabalon nagkumboya'g 44 puntos, 21 ka rebounds, ug 15 ka sssists sa dihang ang UNAHCO Inc. Batch 2022 nakadaog na gyud human gipayaka ang RDAK Powersports Batch 2020, 101-92.
Ang Batch 2021 mitabla sa ilang marka, 4-4 samtang ang Batch 2022 misanta sa unom ka duwa nilang malas.
- Latest
