Asian Orthopedics 7-0 na sa SHAABAA
CEBU, Philippines — Ang Asian Orthopedics Batch 2014 mipatikangkang sa RDAK Powersports Batch 2020, 80-60, alang sa ikapito nilang sagunson nga daog sa Sacred Heart Ateneo Alumni Basketball Athletic Association (SHAABAA) Season 25 didto sa Magis Eagles Arena sa Barangay Canduman, dakbayan sa Mandaue.
Si Josemaria Rafael "Popoy" Navarro mitapos uban ang 13 puntos, lima ka rebounds ug duha ka assists samtang si Noriko Benedicto mitali og 13 puntos ug duha ka rebounds alang sa Batch 2014. Mihimo sab og kasikas si Lucky Ecarma uban ang 12 puntos, 12 ka rebounds ug upat ka assists ug ingon man si Jair Igna nga mikimada og 12 puntos, unom ka rebounds ug upat ka assists sa dihang gipahugtan nila ang pagkupot sa solong liderato sa Division C bitbit ang perpektong 7-0 record.
Sa laing resulta, ang MDP Customs Brokerage-Winzir Batch 2013 nagpabilin sa ikaduhang puwesto uban ang 6-2 nga baraha human gilampaso ang SABR Solutions Batch 2018, 95-71.
Si Rendell Senining maoy nangu sa Batch 2013 uban ang 26 puntos, pito ka reboumds, unom ka assists ug duha ka steals. Gipaluyohan siya nilang Fletcher Galvez nga dunay 18 puntos, 17 ka rebounds, upat ka assists ug upat ka steals ug Arc Gabriel Araw-araw nga mihipos og 16 puntos, lima ka rebounds ug pito ka assists.
Sa Division B, ang SUPREA Ready Mixed Concrete Batch 2011 mibuntog sa Laptap Enterprises & Prince Warehouse Batch 2006, 65-56, aron pagpabilin sa ikaduhang dapit uban ang 6-2 nga marka samtang ang Marjaztin Glass Trading & Construction Batch 2008 nakadimdim na gyud sa katam-is sa kadaogan human gikastigo ang Bizol Batch 2005, 100-66. Si Bradley Bacaltos mibugha og 17 puntos, siyam ka rebounds, upat ka assists ug lima ka steals sa Batch 2011 ug gisundan kini ni Bernard Chioson nga mipupo og 12 puntos, pito ka rebounds ug tulo ka assists. Si Ricardo Pepito mipabuto og 23 puntos, siyam ka rebounds, lima ka assistys ug upat ka steals samtang si Ed Bonphyl Macasling miratsada og 20 puntos, siyam ka rebounds ug tulo ka assists aron tabangan ang Batch 2008 pagpakgang sa unom ka duwa nilang malas.
- Latest
