SABR Solutions 2018, SUPREA 2011 naka-iskor sa SHAABAA
CEBU, Philippines — Ang SABR Solutions Batch 2018 ug SUPREA Ready Mixed Concrete Batch 2011 mibihag sa tagsa-tagsa nila ka mga kontra sa Sacred Heart Ateneo Alumni Basketball Athletic Association (SHAABAA) Season 25 didto sa Magis Eagles Arena sa Barangay Canduman, dakbayan sa Mandaue.
Si Joshua Vincent Mah mipabuhagay og 32 puntos, upat ka rebounds, unom ka assists ug unom ka steaks, samtang si Eroll Pastor mibubo og 21 puntos, 21 ka rebounds ug siyam ka assists sa dihang gipaksit sa Batch 2018 ang RDAK Powersports Batch 2020, 94-77, aron pagpabilin sa ikaupat nga dapit sa Division C bitbit ang 4-1 win-loss record.
Sa laing duwa sa Division C, si Joshua Balankig mipabuto og 30 puntos ug 15 ka rebounds samtang si Jose Lunday miamot og 20 puntos ug 15 ka rebounds sa dihang gibuntog sa Batch 2019 ang UNAHCO Batch 2022, 84-78, alang sa una nilang daog.
Sa Division B, si Bradley Bacaltos miratsada og 26 puntos, unom ka rebounds ug lima ka assists samtang si Bernard Chioson midonar og 16 puntos ug 16 sab ka rebounds sa dihang gipiog sa Batch 2011 ang Marjaztin Glass Trading & Construction Batch 2008, 71-65, aron paglayat sa ikaduhang puwesto uban ang 5-2 nga baraha.
Sa laing resulta, si Jasper Diaz mihipos og 28 puntos ug 14 ka rebounds samtang si Gabe Branzuela miamot og 16 puntos, walo ka rebounds ug upat ka assists sa dihang gipayaka sa Casino Ethyl Alcohol Batch 2010 ang Bad Boys Wingz Batch 2007, 76-68, alang sa ikaupat nilang daog sud sa unom ka duwa.
- Latest
