SHAABAA nakakolekta og P1.2 milyones sa charity 3-point shootout

CEBU, Philippines — Ang Sacred Heart Ateneo Alumni Basketball Athletic Association nakakolekta og kinatibuk-ang P1.2 million atol sa charity 3-point shootout nga usa sa mga milamas sa SHAABAA Season 25 All-Star Games niadtong Dominggo didto sa Magis Eagles Arena sa Barangay Canduman, dakbayan sa Mandaue.

Unom ka Sugbuanong business executives nga mapasigarbuhong Ateneo Hearters ang nagtige sa makalingaw apan todo kumbati nga 3-point shootout kansang tuyo mao ang pagtigum og pundo aron makatukod og gym alang sa mga varsity teams sa Sacred Heart School-Ateneo de Cebu (SHS-AdC).  Kini mao sila si Afshin Ghassemi, Franco Soberano, Edmund Gaisano, Dave Ting, Joseph Lo ug Chase Cokaliong.

Sa wala pa magtinirahay sa korte, silang tanan nagka-uyon nga modonar og P200,000 matag usa alang sa mahinungdanong kawsa.

Si Dave Ting sa Xchange Forex Batch 2000 maoy midaog sa charity shootout.

Sa laing bahin, si Elddie Cabahug sa Bizol 2005 maoy nakampiyon sa competitive 3-point shootout, samtang ang mga Dinsay maoy midominar sa family shootout. Doble ang selebrasyon alang ni Elddie Cabahug gumikan kay ila mang gisaw-an ni Lucky Ecarma sa Asian Orthopedics Batch 2014 ang dungog atol sa engkuwentro sa labing hayag nga mga bitoon sa liga.

Si Cabahug maoy gibayaw nga All-Star MVP sa Division B uban ang 16 puntos, duha ka rebounds, duha ka assists ug usa ka steal sa dihang gibuntog sa Lux Oriens ang Team Magis, 82-79.

Samtang si Ecarma ang gipasidunggan nga All-Star MVP sa Division C human siya mipupo og 20 puntos, 15 ka rebounds, tulo ka assists, duha ka steals ug usa ka block aron pangulohan ang Lux Oriens ngadto sa 88-78 nga pagpakaging sa Magis. Sa Division A, ang Team Magis ug Lux Oriens nagtabla sa iskor nga 84-84.

Sa laing sangka, si Zachy Huang mihipos og 17 puntos, unom ka rebounds, duha ka assists ug tulo ka steals sa dihang gipayaka sa All-Star Selection ang All-Star Varsity, 92-82.