EJ kampeon sa Germany

MANILA, Philippines — Balik ang angas ni Tokyo Olympics veteran Ernest John Obiena matapos sumikwat ng gintong medalya sa men’s polo vault sa Jump and Fly meet sa Weiherstadion, Hechingen sa Germany.

Naitarak ni Obiena ang impresibong 5.80 metro upang masiguro ang korona sa torneo.

Nakuha nito ang winning mark sa kanyang ikatlong attempt.

Sinubukan ni Obiena na wasakin ang kanyang Asian record na 5.93 metro ngunit bigo itong makuha ang 5.94 metro sa kanyang dalawang pagtatangka.

Matagumpay na nadepensahan ni Obiena ang kanyang titulo sa naturang torneo matapos pagharian ang 2021 edisyon tangan ang 5.85 metro na naitala noong nakaraang taon.

Ito ang ikaanim na gintong medalya ni Obiena sa taong ito.

“Sixth gold for the year reppin’ the Philippines. Keep jumping, keep improving. With God’s grace and determination, we’ll soon get to reach our goal,” ani Obiena sa kanyang post.

Pinataob ng Pinoy bet si Huang Bokai ng China na nagkasya lamang sa pilak tangan ang 5.50 metro habang pumangatlo si Vincent Hobbie ng Germany na may 5.10 metro na nairehistro.

Hindi lumahok sa event sina reigning Olympic champion Armand Duplantis ng Sweden at Piotr Lisek ng Poland.

Kamakailan lamang ay naitala ni Duplantis ang bagong world record na 6.16 metro sa Bauhaus-Galan sa Stockholm.

Sa naturang event, nagsumite lamang si Obiena ng 5.73m.