Jokic mipirma'g record nga kontrata sa NBA Durant gustong magpa-trade gikan sa Nets

CEBU, Philippines — Si two-time defending NBA Most Valuable Player Nikola Jokic magpabilin sa Denver Nuggets ubos sa lima sa ka tuig nga supermax contract extension nga mibalor og $264 million nga maoy labing dako sa labing sa kasayayan sa liga.

Ang Serbian nga sentro, nga maoy second round pick sa Nuggets niadtong 2014 NBA Draft, daan na hinoong mipahibawo nga gusto niyang magahigot sa Nuggets gumikan kay wala siya'y problema gikan sa tag-iya ngadto sa labing ubos nga sakop sa iklang organisasyon.

"I really like the organization, I really like the people who work here," matud pa ni Jokic. "I'm really in a good relationship with everybody from owner to equipment manager."

Samtang hapsay ang relasyon ni Jokic ug ang Nuggets, lahi ang dagan sa estorya didto sa Brooklyn gumikan kay ang ilang superstar nga si Kevin Durant gikataho nga mihangyo og trade gikan sa Nets nga nakapalurat sa liga pagsugod sa free agency.

Sigun sa taho sa ESPN gamit ang wala hinganling mga tinubdan, si Durant, nga nakampiyon duha ka higayon uban sa Golden State Warriors, naglantaw nga motapon sa Phoenix Suns o sa Miami Heat.

Apan ang Nets mangita sa labing nindot nga posibleng NBA deal alang ni Durant nga duna pay nahibiling upat ka tuig sa buhi niyang kontrata uban sa Brooklyn.

Ang 33-anyos nga si Durant mipirma og lab-as nga upat ka tuig nga kontrata sa Nets niadto lamang miaging tuig sa kantidad nga $198 million. Naabot siya sa Brooklyn niadtong 2019 human milayas sa Golden State. Sa laing bahin, si Philadelphia star James Harden wala mogamit sa $47.36 million niyang player option alang sa sunod nga season apan nagplano siyang magpabilin sa Sixers.