Parokya ni Edgar, Spit On Them 2-0 na

CEBU, Philippines — Ang Parokya Ni Edgar ug Spit On Them mibulhot ngadto sa ikaduha nilang sagunson nga daog sa Sunday Night Hoops adidto sa City Sports Club-Cebu gym.

Si Michael Esparrago mihipos og 12 puntos ug 10 ka rebounds sa dihang gipakaging sa Spit On Them ang Brazzers, 54-42, samtang si Red Esponilla mipupo og 12 puntos, siyam ka rebounds ug tulo ka assists sa dihang gilat-an sa Parokya Ni Edgar ang Fastbreak, 60-40.

Sa laing mga duwa, ang Labangon Reapers nakaipsot sa Space Jam, 59-56, samtang ang Rustans mipatigbabaw batok sa Castille, 49-45.

Si Jasper Gementiza mirehistro og 10 puntos ug walo ka rebounds alang sa Reapers, samtang si Vin Llanos maoy nangu sa  Rustans uban ang 19 puntos, lima ka rebounds ug upat ka assists.