Gudes nangu ikapitong daog sa DMY Events
CEBU, Philippines — Si Jeff Gudes mipatuasik og 32 puntos sa dihang gilat-an sa DMY Events ang KJK Reino, 101-74, sa Hoop Nation Arlon Cup Season 1 niadtong weekend didto sa City Sports Club-Cebu gym.
Mipupo sab si Gudes og lima ka rebounds ug duha ka steals alang sa DMY Events nga mipahugot sa ilang pagkupot sa ikatulong dapit sa West Division bitgit ang 7-1 win-loss record.
Si Kenneth Babor mitapos uban ang 21 puntos apan way nahimo tungod kay ang KJK Reino nakatilaw sa ikalima nilang pilde sud sa pito ka duwa.
Sa laing mga duwa, ang Manumen mipiog sa PJL Hoopers, 64-58, samtang ang Cebuanos nakaipsot sa RKC, 66-62.
Si Raul Pangilinan mibugha og 22 puntos, 11 ka rebounds ug tulo ka assists alang sa Manumen nga nagtangag na karon og 3-6 nga baraha.
Wala sab magpabitin si Wilkin Sanchez nga mikadlit og 27 puntos, tulo ka asists ug lima ka steals alang sa Cebuanos nga miposte sa ikaupat nilang daog sud sa siyam ka duwa.
Ang RKC natagak sa 2-6 samtang ang PJL Hoopers bokya gihapon human masagunsoni og pito ka pilde.
- Latest