Marcial makikipagpulong sa B.League at KBL officials
MANILA, Philippines — Makikipag-usap si PBA Commissioner Willie Marcial sa mga top officials ng Japan B.League at Korean Basketball League (KBL) kaugnay sa paglalaro ng mga Pinoy cagers sa kanilang mga liga.
Kabilang sa mga naglalaro sa B.League bilang Pinoy imports ay ang magkapatid na Kiefer (Shiga Lakestars) at Thirdy Ravena (San-en NeoPhoenix), Bobby Ray Parks Jr. (Nagoya Diamond Dolphins), Kobe Paras (Altiri Chiba) at Dwight Ramos (Levanga Hokkaido).
Sasalang din sa B.League si dating La Salle Green Archers at Gilas Pilipinas big man Justine Baltazar para sa Hiroshima Dragonflies.
Nakatakda namang sumabak sa KBL sina dating Ateneo Blue Eagles star guard SJ Belangel at Far Eastern University Tamaraws playmaker RJ Abarrientos.
Isusuot ni Belangel ang uniporme ng Daegu Korea Gas Corporation (KOGAS) sa KBL habang maglalaro si Abarrientos para sa Ulsan Hyundai Mobis.
“Tingnan natin, kasi two months ago, nag-uusap na kami ng Japan at ng Korea kung paano,” ani Marcial sa kanyang pakikipagpulong kina B. League chairman Shinji Shimada at KBL Commissioner Kim Hee Ok.
Magtutungo si Marcial sa Japan sa Setyembre para makipag-usap ay Shimada ukol sa inaasahang pagplantsa sa relasyon ng PBA at ng B.League.
Malalaking kontrata ang inaalok ng mga B.League teams na kinakagat ng ilang PBA at collegiate players na ginagawa rin ngayon ng KBL.
- Latest
