MANILA, Philippines — Bumida si Tokyo Olympic Games Most Valuable Player Earvin Ngapeth sa 25-14, 25-23, 25-13 paggiba ng World No. 3 France sa Netherlands para solohin ang liderato ng Volleyball Nations League Week 2 men’s division kahapon sa Smart Araneta Coliseum.
Kumolekta si Ngapeth ng 8 points, 5 receptions at 4 digs para sa kanyang all-around game at tulungan ang France sa paglilista ng 15 points mula sa 5-1 record.
Umiskor si Stephen Boyer ng 15 points habang may 12, 11 at 10 markers sina Barthelemy Chinenyeze, Trevor Clevenot at Nicolas Le Goff, ayon sa pagkakasunod.
Nasa ikalawang puwesto ang United States na may 14 points kasunod ang Japan na may 13 points sa torneong inihahandog ng PLDT katuwang ang The STAR, Quezon City Mayor Joy Belmonte, Maynilad, Philippine Sports Commission at Philippine Olympic Committee.
Nahulog ang Dutch sa No. 6 tangan ang 9 points.