Javier Ceramics kampiyon sa 1st JJ's Electrical Cup 2022
CEBU, Philippines — Lab-as pa gikan sa ilang panumduman, ang Javier Ceramics Design mikolekta na sab og laing korona human maghari sa 1st JJ’s Electrical Cup 2022 dihang ilang gipilde ang Livhelti Mushrooms Farm, 74-63 sa finals niadtong Domingo diha sa CEC gym.
Kini ang ikaduhang sunod-sunod nga korona sa Javier Ceramics sud lamang sa kapin duha ka bulan.
Ang finals MVP nga si Kenn Rolf Nunez maoy nangu sa tanang scorers sa Javier Ceramics pinaagi sa iyang 24 puntos. Aduna sab siya’y 10 ka rebounds ug unom ka assists.
Labaw lang og kuwatro puntos ang Javier Ceramics sa halftime, 37-33, apan mipauwan kini og mga puntos sa third period aron bingaton ang ilang labaw ngadto na sa 66-45 paghuman sa maong kuwarter. Gikan niadto, kontrolado na sa Javier Ceramics ang duwa dayon na paglangkat sa kampiyonato.
Si Jessie Sanchez miamot og 20, samtang si Bruce Panta mitampo’g 11 puntos sa Javier Ceramics ni team owner Jade Penera, kinsa atua pa gihapon sa Canada.
Ang Livhelti gipangulohan ni season MVP Rico Rosaroso pinaagi sa iyang 23 puntos, gisundan ni Charlie Lumasag nga adunay 15 puntos. Sila si Ernie Ygot ug Francis Bauntad nagtampohay og 11 puntos sa koponan ni Nestle Key Flores.
Sila si Nunez ug Rosaroso otomatik nga naapil sa Mythical Five uban nilang Marco Booker Panta sa Javier Ceramics, Dan Cardenas sa Cocoroj Construction Supply ug Lorenzo Isip sa JJ’s Electrical Supply.
Sa gubat alang sa ikatulong dapit, ang Cocoroj ni Roger Cardenas midaog batok sa JJ’s Electrical Supply ni Joeffrey Banaag sa iskor nga 87-79.
Gipangulohan ang daog ni Dan Cardenas sa iyang 30 puntos. Si VM Cempron mihirit og 16 puntos, samtang sila si Duanne Manacap ug Rafraf Panares nag-amotay og 11 ug 10 puntos matag usa.
Sila lang si Joshua Banaag ug Ronald Vargas ang miiskor og double figures sa napildeng koponan sa ilang 18 ug 12 puntos.
Ang liga nagmalampuson pinaagi sa paningkamot sa league organizers nga silang Joeffrey Banaag ug Marvin Sillar.
PUNTOS MATAG USA
Unang duwa
Cocoroj (87) — D. Cardenas 30, Cempron 16, Manacap 11, Panares 10, CJ Cardenas 7, Morta 4, Jariol 4, J. Cardenas 2
JJ’s Electrical (79) — Banaag 18, Vargas 12, Panoncillo 9, Awit 9, Banaag 9, Pagambunan 7, Arellano 7
Ikaduhang duwa
Javier (74) — Nunez 24, Sanchez 20, Panta 11, D. Rollon 8, Libre 6, Ihalas 3, K. Sillar 2, R. Rollon 2, Busmion 1
Livhelti (63) — R. Rosaroso 23, Lumasag 15, Ygot 11, Bauntad 11, Binolirao 4, Binondo 2 —(MYRA)
- Latest