Team Kobe, S.I.V, Aiperon padayong  nanginit sa Hoops Arlon Cup

CEBU, Philippines — Padayong miratsada ang Team Kobe, S.I.V, ug Aiperon International Fighters sa Hoops Arlon Cup Season 1 niadtong weekend didto sa City Sports Club-Cebu gym.

Si Jonas Mejos mipabuhagay og 24 puntos ug 12 ka rebounds sa dihang gipayaka sa Team Kobe ang Broncos, 68-58, aron pahugtan ang ilang pagkupot sa solong liderato sa East Division bitbit ang perpektong 8-0 record.

Sa West, si Ian Taneo mipupo og 10 puntos, lima ka rebounds ug upat ka assists sa dihang gilat-an sa S.I.V blew ang Pfizer, 109-59, aron pagpabiling way pilde sud sa unom ka duwa.

Wala sab magpa-alkansi ang Aiperon nga mibuntog sa Manumen, 56-49, aron inaton ang impresibo nilang marka ngadto sa 5-0.  Si Amir Batiancila maoy bida sa Aiperon uban ang 16 puntos, walo ka rebounds, ug pito ka assists.

Sa laing bahin, si Chester Hinagdanan mitali og 18 puntos uban ang lima ka rebounds ug duha ka blocks sa dihang ang AEG nakaipsot sa I.28 Realty, 66-64, alang sa ikaunom nilang daog nga giatbangan og usa lamang ka pilde, samtang si Chester Banono mikadlit og 23 puntos, walo ka rebounds ug upat ka assists sa dihang giinat sa Trojan Warriors ang ilang baraha ngadto sa 5-2 human gipakaging ang 5 Joints, 67-61.

Sa ubang mga resulta, si Bal Zaspa mipabuto og 36 puntos, 13 ka rebounds ug upat ka steals sa dihang gipaak sa Wolves ang Clutch City, 65-60, alang sa ikatulo nilang daog sud sa pito ka duwa, samtang si Christian Gallarde mibubo og 14 puntos, lima ka rebounds ug upat ka assists alang sa Punisher, nga miposte sa ikaduha pa lamang nilang daog sa pito ka duwa human nakalingkawas batok sa Dextructures, 74-73.