Mayor Mike Rama Basketball League banatan na

CEBU, Philippines — Lima ka teams ang mopakita'g aksiyon sa 1st Cebu City Mayor Mike Rama Basketball League 2022 nga kumbatihan sugod sa alas-6 sa gabii karong adlawa didto sa Cebu City Sports Institute sa Barangay Sawang Calero.

Ang ARQ Builders maoy nag-una sa listahan sa mga entranteng koponan nga naglangkob sab sa Deon Motors, Truck N' Trail Transport, Fighter Fifty, ug Artera Builders.

Moduwa sila og single round robin diin ang top 2 teams mo-abante sa tinagakay nga kampiyonato karong Martes, Hunyo 1.

Ang makampiyon mobulsa og P200,000, samtang ang mopahiluna sa ikaduha ngadto sa ikaupat nga dapit makadawat og P150,000, P100,000, ug P50,000.

Ang lima ka adlaw nga torneyo hugtanong gipaluyohan ni Cebu City Mayor Mike Rama ug vice mayor Dondon Hontiveros inabagan sa Cebu City Sports Commission pinaagi ni executive director Amilo Lopez.

Ang tanang mga duwa ubos sa superbisyon ni commissioner Atty. Mike Aton. Sila si Allen Ceballos ug Serapion Cortes kabahin sa organizing committee.