Mavs buhi pa
CEBU, Philippines — Naka-angkon pa og laing kinabuhi ang Dallas Mavericks human gibaslan ang Golden State Warriors, 119-109, sa Game 4 sa ilang best-of-seven NBA Western Conference Finals kagahapon didto sa American Airlines Center sa Dallas, Texas.
Bukid pa hinoon gihapon ang tungason sa Mavs gumikan kay dako pa kaayo ang 3-1 nga labaw sa Warriors.
Sa 75 ka tuig nga kasaysayan sa NBA, wala pay team nga nakabangon human masagunsoni og pilde sa nag-unang tulo ka duwa sa serye.
Konsolasyon na lang sa Mavs nga nalugwayan pa og usa ka duwa ang ilang season.
Hapit pa gani sila madisgrasya kay mikolapso human naglabaw og 29 puntos, 99-70, sa pinal nga 12 minutos sa aksiyon.
Ang Warriors nakasikit ngadto na lang sa otso puntos, 102-110, apan si Luka Doncic mihansak sa bola sa wala pa si Reggie Bullock milansang og hagpok nga 3-pointer aron pagpaginhawa og lawom sa Mavs uban ang 115-102 nga labaw sa nahibilin nga 2:43 sa duwa.
Si Doncic maoy nangu sa Mavs bitbit ang 30 puntos, 14 ka rebounds, ug siyam ka assists. Dakong rebelasyon si Dorian Finney-Smith nga mitimbre og 23 puntos, samtang sila si Bullock ug Jalen Brunson nagkumboya'g 33 puntos alang sa Mavs.
Si Stephen Curry mihipos og 20 puntos, lima ka rebounds ug walo ka assists alang sa Warriors, nga mosuway paghuman sa serye sa Game 5 nga molabyog og balik didto sa ilang korte karong Biyernes.
- Latest
