Warriors nanoktok sa NBA finals

CEBU, Philippines — Sila si Stephen Curry ug Andrew Wiggins maoy mga bida sa dihang gipayaka na sab sa Golden State Warriors ang Dallas Mavericks, 109-100, aron pag-inat sa ilang labaw ngadto sa 3-0 sa best-of-seven NBA Western Conference Finals kagahapon didto sa American Airlines Center sa Dallas, Texas.

Si Curry mikolekta og 31 puntos, 11 ka assists ug lima ka rebounds samtang si Wiggins nagmangtas sab uban ang 27 puntos ug 11 ka rebounds alang sa Warriors, nga nanginahanglan na lang og usa ka daog aron motikang sa NBA Finals sa unang higayon sud sa tulo ka tuig.

Dako sab og natampo si Klay Thompson nga mihipos og 19 puntos ug ingon man sila si Draymond Green ug Jordan Poole mikimada og 10 puntos matag usa.

Si Luka Doncic mipabuto og 40 puntos apan nakawang gihapon ang iyang paningkamot sa kampo sa Mavs.

Ang Mavs, nga maoy mo-host sa Game 4 karong Miyerkules, nanginahanglan og usa ka dakong milagro gumikan kay sa 75 ka tuig nga kasaysayan sa NBA, wala pay team nga nakabangon human malubong og 3-0 sa usa ka serye.