Warriors giusban ang Mavs, 2-0 na sa NBA West Finals

CEBU, Philippines — Si Stephen Curry miposa og unom ka tres sa iyang 32 puntos samtang si Kevon Looney mikadlit og career-high 21 puntos uban ang 12 ka rebounds sa dihang giusban  sa Golden State Warriors ang Dallas Mavericks, 126-117, aron pagposte og 2-0 nga bentaha sa ilang best-of-seven NBA Western Conference Finals kagahapon didto sa Chase Center sa San Francisco, California.

Sa gihapon, ang Warriors migamit sa naandan na nilang pagmangtas sa ikatulong kuwarter aron wanihon na sab si Luca Doncic ug ang Mavs.

Ang Mavs mao kanunay ang nagkontrola sa duwa sa wala pa nakatilaw ang Warriors sa una nilang labaw, 86-85, human sa 3-pointer ni Otto Porter Jr. sa nakaon nga nga 18 segundos sa katapusang kuwarter.

Si Doncic mipabuto og 42 puntos, 18 niini sa unang kuwarter nga nakatabang sa Mavs pag-abante og 14 puntos, 72-58 , sa halftime.

Apan ang Warriors milusad og mainit nga 25-13 rally hinungdan nga nakasikit sila ngadto na lang sa dos puntos, 83-85, padung ngadto sa pinal nga 12 minutos sa aksiyon.

Human mabira ang manibela sa opensiba, ang Warriors miinat pa sa ilang bentaha ngadto 100-92 sa nahibiling siyete minutos ug wala na sila molingi pa sukad niadto.

Si Jordan Poole midugang og 23 puntos, samtang sila si Andrew Wigginsug Klay Thompson naglumboya'g 31 puntos alang sa Warriors.

Si Jalen Brunson, nga mi-iskor og walo sa nag-unang 14 puntos sa Mavs, mitapos ubang ang 31 puntos sa pilderong Dallas nga maoy mo-host sa Game 3 karong Lunes.