CEPCA Prexy Jerry chessfest banatan karon
CEBU, Philippines — Usa ka panon sa mga chess masters ang magtakos sa ilang abilidad sa Cebu Executives and Professionals Chess Association (CEPCA) Prexy Jerry Open Tournament karong adlawa diha sa Barracks Chess Club sa Robinsons Galleria Cebu. Magsugod ang pinug-anay sa utok sa alas-11 sa buntag.
Nag-una sa listahan sa lig-ong mga entrante mao sila si International Master Joel Pimentel ug National Masters Merben Roque, Rogelio Enriquez Jr., Arnold Cadiz ug Jerish John Velarde nga bag-ohay pang milangkat og duha ka gold medals alang sa Pilipinas sa ASEAN Age-Group Championships.
Mopakita sab og aksiyon sa labing unang face-to-face nga torneyo sa CEPCA sud sa duha ka tuig sila si Richard Natividad, Lincoln Yap, Bhel Ortiz, Allan Pason, Antonio Cabibil, Carlos Moreno III, Joel Pacuribot, Cyril Ortega, Ceferino Vizco, Cephas Seguisabal, Venancio Loyola Jr., Amado Olea ug Rey Flores.
Dalit ni CEPCA president Engr. Jerry Maratas alang sa mga Sugbuanong chess players sa adlaw niyang natawhan, miabot ngadto sa P20,000 nga ganting salapi ang iapud-apud sa mga mananaog ning siyam ka hugna nga kompetisyon.
Ang makampiyon mobulsa og P5,000 samtang ang mopahiluna sa ikaduha ngadto sa ikalimang dapit makadawat og P3,000, P2,000, P1,000 ug P700. Ang 6th to 15th mokubra og P500 matag usa. Ang top 3 Cepcans (A ug B) dunay P500 nga insentibo ingon man ang top senior, lady ug kiddie players.
- Latest
