Obiena sasalang agad sa 2 torneo
MANILA, Philippines — Kagaya ni two-time world champion gymnast Caloy Yulo, may lalahukan ding torneo si World No. 6 pole vaulter Ernest John Obiena sa mga susunod na buwan.
May sasalihan siyang international tournament sa Italy sa huling linggo ng Mayo at sasabak sa bigating Wanda Diamond League sa Oslo, Norway sa Hunyo 16.
Magmumula si Obiena sa paglundag sa gold medal sa 31st Southeast Asian Games sa Hanoi, Vietnam para sa matagumpay na pagdedepensa sa kanyang korona.
“Pilipinas Salamat. Defended the title and got a bonus SEA Games,” wika kahapon ng 6-foot-2 na si Obiena sa kanyang Facebook post. “Thank you for everyone who have made this possible. Maraming salamat po.”
Sinira ni Obiena ang sarili niyang record sa SEA Games nang iposte ang bagong 5.46-meters habang nagtala si teammate Hakkett Delos Santos ng 5.00 meters para sa silver medal.
Bago sumabak sa Vietnam SEA Games ay nagkaroon ng sigalot sina Obiena at athletics president Philip Ella Juico hinggil sa isinumiteng dokumento ng Pinoy pole vaulter hinggil sa liquidation ni Ukrainian coach Vitaly Petrov.
“I think that was the most difficult part for me in this certain SEA Games,” wika ng 25-anyos na Tokyo Olympian.
- Latest