La Salle, UP unahan sa ika-4 na panalo
MANILA, Philippines — Mag-uunahan sa pang-apat na panalo ang De La Salle University at University of the Philippines sa pagharap nila sa UAAP Season 84 women’s volleyball tournament ngayon sa SM Mall of Asia Arena sa Pasay City.
Parehong tangan ang 3-2 records, magsisimula ang bakbakan sa alas-10 ng umaga.
Ibabandera ng Lady Spikers si rookie Alleiah Malaluan na humarabas sa opensa nang kaldagin nila ang University of the East Lady Red Warriors, 25-15, 25-14, 25-15 noong Sabado.
Nagtala si Malaluan ng 14 points, nakatuwang niya sa opensa sina Fifi Sharma at Jolina Dela Cruz na may tig 10 points ang inambag.
Nais naman ng Lady Maroons na kalsuhan ang two-game skid nila kaya ipantatapat naman nila sina team captain Jewel Encarnacion at Alyssa Bertolano para masikwat ang kanilang panalo.
Tiyak na dodoblehin nina Encarnacion at Bertolano ang kanilang matikas na laro upang masilo ang inaasam na panalo.
Apat ang nagsisiksikan sa No. 2 spot sa magkakatulad na karta--ang UP at DLSU, University of Santo Tomas Golden Tigresses at Adamson University Lady Falcons.
Samantala, magpapaluan ng bola ang Ateneo at UE Lady Red Warriors sa alas-12 ng tanghali, maggigirian naman ang UST at Adamson U sa alas-4 ng hapon habang sa alas-6 ng gabi ay bakbakan ang National University Lady Bulldogs at Far Eastern University Lady Tamaraws.
- Latest