Lobos makikipagsabayan sa Tokyo Olympics bronze medalist

MANILA, Philippines — Anim na Pinoy tankers pa ang sasalang ngayong araw sa pagpapatuloy ng 10th Circle of Swimmers of Melun Val de Seine na ginaganap sa Piscine de Melun swimming pool sa Melun, France.

Bumabandera sa hahataw ngayong araw si Quezon Province pride Jordan Ken Lobos na makikipagsabayan sa mga world-class swimmers sa men’s 200m breaststroke.

Makakasagupa ni Lobos si Jeremy Desplanches ng Switzerland na bronze medalist sa 2020 Tokyo Olympics gayundin sina French tankers Jonathan Knockaert at Nael Buffaumene.

“We are looking forward to the 200 breaststroke event of Jordan Ken Lobos as he goes side to side with Tokyo Olympic Medalist Jeremy Desplanches in the prelims. I hope this will continue until they reach the finals. This will be a big chance for him to lower his times and achieve personal best as well as get a podium finish,” ani Philippines BEST-Swim League Philippines team manager Joan Mojdeh.

Puntirya ni Lobos na makahirit ng medalya sa France meet matapos mabigong makasikwat  ng slot sa national team na lalaban sa 31st SEA Games sa Hanoi, Vietnam.

Ang France tournament ang huling swimming event na lalahukan ni Lobos dahil inaasahang magsisimula na ito sa tradisyunal na serbisyo sa kanilang religious group.

Maliban kay Lobos, sasalang din sa second day ng kumpetisyon si Brent International School standout Micaela Jasmine Mojdeh sa women’s 200m IM at 200m butterfly.