Tigresses gustong makabangon agad
MANILA, Philippines — Walang ibang nasa kukote ng University of Santo Tomas Golden Tigresses kundi ang makabangon agad mula sa pagkakadapa.
Sumadsad ang Golden Tigresses sa University of the Philippines Fighting Maroons, 21-25, 25-23, 21-25, 22-25 noong Martes at namantsahan ang malinis nilang karta.
Kaya naman tiyak na itotodo ng Golden Tigresses ang kanilang lakas para gapiin ang De La Salle University Lady Spikers sa UAAP Season 84 women’s volleyball tournament, ngayong araw sa SM Mall of Asia Arena sa Pasay City.
Tangan ang 2-1 card, kakapitan ng España-based squad, UST si Eya Laure laban sa Lady Spikers ngayong ala-6 ng gabi.
Para sa Lady Spikers na may 2-1 karta rin, sina Alleiah Malaluan at Jolina Dela Cruz naman ang kanilang ipananargo upang masilo ang pangatlong panalo at manatiling malakas sa asam na titulo ngayong season.
Samantala, magpapaluan para sa quadruple-header games ang University of the East Lady Warriors at National University Lady Bulldogs sa alas-10 ng umaga, magsasagupa naman ang Ateneo Blue Eagles at Far Eastern University Lady Tamaraws sa alas-12 ng tanghali habang sa pangatlong laro ay ang Adamson Lady Falcons at University of the Philippines Fighting Maroons naman ang magkalaban sa alas-4 ng hapon.
- Latest