PBA awards isasabay sa Season 47 opening
MANILA, Philippines — Muling isasabay ng Philippine Basketball Association (PBA) ang pagdaraos ng Season 46 Awards Night sa pagbubukas ng Season 47 sa Hunyo 5 sa Smart Araneta Coliseum.
Unang ginawa ito ng PBA noong Marso 8, 2020 kung saan hinirang si June Mar Fajardo ng San Miguel bilang MVP sa ikaanim na pagkakataon kasunod ang mga laro ng Season 45 sa Big Dome.
“It was a great gathering in a great evening enjoyed by everybody, especially the fans,” ani PBA Commissioner Willie Marcial
Matagumpay na nairaos ng liga ang katatapos na Governors’ Cup na pinagharian ng Barangay Ginera laban sa Meralco.
Nagkampeon ang TNT Tropang Giga sa Philippine Cup kontra sa Magnolia sa semi-bubble sa Bacolor, Pampanga.
“For this one, it would also be a celebration of sorts dahil muli nating kasama ang mga fans sa opening ceremony pagkatapos na ma-miss natin sila sa panahon ng pandemya,” ani Marcial.
Automatic MVP contenders na sina Scottie Thompson ng Ginebra at Calvin Abueva ng Magnolia matapos silang hirangin bilang mga Best Player of the Conference winners sa Season 46.
Nakamit ni Thompson ang BPC sa PBA Governors’ Cup at nakuha ito ni Abueva sa Philippine Cup.
Ang iba pang ibibigay ay ang Mythical Selections, Rookie of the Year, Most Improved Player, Sportsmanship Award at Best Defensive Selection.
- Latest
