Philippines poomsae taekwondo team wagi ng 5 medalya
MANILA, Philippines — Limang medalya ang inangkin ng SMART/MVP Sports Foundation national poomsae taekwondo team sa katatapos lamang na 2022 World Taekwondo Poomsae Championships na ginanap sa Goyang, South Korea.
Tampok rito ang ibinulsang gold medal ni Ernesto Guzman, Jr. sa Individual Male -50 class, habang nakuntento sina Justin Kobe Macario at Juvenile Faye Crisostomo sa silver medal sa Freestyle Mixed Pair +17.
Sumegunda rin sina Ian Matthew Corton at Maria Nicole Anne Labayne sa Recognized Mixed Pair -17 para sa kampanya ng mga Pinoy jins sa world event na nilahukan ng 64 bansa kabilang ang host South Korea, Chinese-Taipei, Germany, France, USA, Spain, Mexico, Japan, Italy, Brazil, Canada, Thailand, Indonesia at Vietnam.
Nasungkit naman nina Darius Venerable at Rodolfo Reyes, Jr. ang bronze medal sa nilahukang Freestyle Individual Male +17 at Recognized Individual Male -30, ayon sa pagkakasunod.
Suportado ng Philippine Taekwondo Association (PTA) at ng Philippine Sports Commission (PSC) ang paglahok ng koponan sa nasabing kompetisyon.
- Latest
