Sotto suportado ng sambayanan

MANILA, Philippines — Bumuhos ang suporta ng buong sambayanan para kay Kai Sotto na pormal nang nagpahayag ng paglahok sa NBA Draft na gagaganapin sa Hunyo 23 (Hunyo 24) sa Barclays sa New York City.

Kaliwa’t kanan ang maiinit na mensahe mula sa iba’t ibang personalidad sa mundo ng basketball para maging matagumpay ang pangarap ni Sotto na makapasok sa NBA.

Nangunguna na sa listahan si dating Gilas Pilipinas head coach Tab Baldwin na naniniwalang handa na ang 7-foot-3 Pinoy cager sa NBA matapos ang matikas na kampanya nito sa Australia National Basketball League (NBL).

Nakasama ni Baldwin si Sotto sa training camp noong ito pa ang humahawak sa Gilas Pilipinas program.

Nakita ni Baldwin na malaki ang potensiyal ni Sotto dahil sa malalim na basketball IQ nito.

Kaya naman hindi maitago ni Baldwin ang excitement na makita si Sotto na naglalaro sa NBA stage.

“I’m just excited for the opportunity that he might get drafted, and if he does, he gets a real chance to make a roster, and then it would be a dream come true for this basketball-crazy country,” ani Baldwin.

Masaya rin sina Forthsky Padrigao at Geo Chiu na naging teammates ni Sotto sa kampanya ng Gilas Youth sa SEABA at FIBA Asian Championships.

Personal na nasaksihan ni Chiu ang malaking pagbabago sa laro ni Sotto.

“Sobrang laki na ng improvement niya and excited kaming lahat sa magi­ging journey. Lahat kami nakasuporta sa kanya,” ani Chiu.

Sariwa pa si Sotto sa kampanya sa Australia NBL kung saan naglaro ito para sa Adelaide 36ers.

Bumuhos din ang suporta mula sa Pinoy basketball fans sa iba’t ibang panig ng mundo lalo pa’t dadalhin ni Sotto ang Pinoy pride sa isang world class league gaya ng NBA.