Diaz, Obiena babanderahan ang Team Philippines sa SEAG
MANILA, Philippines — Desidido sina weightlifter Hidilyn Diaz at pole vaulter EJ Obiena na makasikwat ng gintong medalya upang pamunuan ang kampanya ng Team Philippines sa 31st Southeast Asian Games na idaraos sa Mayo sa Hanoi, Vietnam.
Maliban sa SEA Games, target din ni Diaz na makapag-kwalipika sa 2024 Paris Olympics upang madepensahan ang kanyang korona na nakamit noong Tokyo Olympics sa Japan.
“I still want to finish my studies. I still want to play, represent the Philippines in the SEA Games and hopefully represent the country in the Paris 2024 Olympics with EJ,” ani Diaz.
Matatandaang nagreyna si Diaz sa women’s 55-kilogram ng Tokyo Games para ibigay sa Pilipinas ang kauna-unahang gintong medalya nito sa Olympics.
“Marami nagsasabi na nakakuha na ng ginto, okay na yun. Pero bilang atleta, hindi naman doon natatapos yun. Gusto kong maging inspirasyon sa iba pang atleta at mga kabataan,” ani Diaz.
Sa kabilang banda, nakasentro rin ang atensiyon kay Obiena na inaasahang wawasakin ang kanniyang sariling rekord sa SEA Games.
Kasalukuyang hawak ni Obiena ang SEA Games record na 5.45 metro distansya na nakamit nito noong 2019 SEA Games.
Maliban sa SEA Games, si Obiena rin ang nagmamay-ari ng Asian record na 5.93 metro. Siya rin ang tatayong flagbearer sa Vietnam SEAG.
- Latest