Embiid bida, sixers 3-0 na

CEBU, Philippines — Si Joel Embiid milansang og makapakurat nga 3-pointer sa nahibilin nga 0.8 segundos aron paghatag sa Philadelphia 76ers og makalisang nga daog batok sa Toronto Raptors sud sa overtime, 104-101, ug ingon man 3-0 nga bentaha sa ilang best-of-seven NBA Eastern Conference first-round playoff series kagahapong adlawa.

Ang 28-anyos nga si Embiid, ang scoring champion ning NBA season, midawat sa bola gikan sa inbound pass duol sa sideline unya kalit nga mituyok dayong itsa sa bola nga mitaop sa ring dayong kapupos sa oras nga nagpalutaw sa Sixers sa panganod sa himaya.

Si Embiid, nga usa sa mga finalists pagka-MVP, mitapos uban ang 33 puntos ug 13 ka rebounds alang sa 76ers nga madasigong mibangon human malubong og 17 puntos dayon na sa pagtikang ngadto sa usa na lang ka daog aron hingpit nang mo-abante sa ikaduhang hugna sa playoffs.

Dako sab og natampo si James Harden nga mitali og 19 puntos ug 10 ka assists ug ingon man sila si Tyrese Maxey ug Tobias Harris nga nagkuminat og 30 puntos alang sa Sixers.

Pait kaayo ang maong kaparotan alang sa Raptors nga nakakuha og tinigum nga 70 puntos gikan nilang O.G. Anunoby, Gary Trent Jr. ug  Precious Achiuwa.

Gawas sa Sixers, ang Bostons Celtics nakalingkawas sab human mabiyai og 17 puntos aron patikangkangon ang Brooklyn Nets, 114-107, nga nakahatag kanila og 2-0 nga labaw sa kaugalingon nilang serye.

Si Jaylen Brown mi-iskor og 10 sa iyang 22 puntos sa katapusang kuwarter samtang si Jayson Tatum midugang og 19 puntos. Nagparamdam sab sila si Grant Williams, Al Horford ug Daniel Theis nga nagkumboya og 48 putnos alang sa Celtics.

Si Kevin Durant maoy nangu sa pildrong Nets bitbit ang 27 puntos samtang ang sidekick niyang Kyrie Irving na-angklahan ngadto lamang sa 10 pountos.

Didto sa Milwaukee, ang Bucks nakabawi unta human gilat-an og 18 puntos apan wala sila kapuhal sa gipabutong 41 puntos ni DeMar DeRozan nga nag-aswat sa Chicago Bulls ngadto sa 114-110 nga kadaogan batok a defending champion.

Tabla na karon ang ilang serye sa baraha  nga 1-1.

Si Giannis Antetokounmpo mihipos og 33 puntos, 18 ka rebounds ug siyam ka assists apan nakawang ang iyang paningkamot sa habig sa Bucks.