Lapu-Lapu Chiefs namawi, gibugha ang Archangels

CEBU, Philippines — Ang ARQ Lapu-Lapu City Chiefs dali nga nakabawi sa miagi nilang kapildihan ug gipahimungtan sa ilang kapungot ang Iligan Archangels, 71-58, sa 2022 Pilipinas Super League (PSL) Under 21 Aspirants Division Invitational Cup kagahapon didto sa President Manuel A. Roxas Sports Complex sa Roxas, Zamboanga del Norte.

Si Jeco Bancale mitagak og 14 puntos, upat ka rebounds ug tulo ka assists samtang lain pang duha ang mikadlit og double figures sa dihang ang Chiefs mipakita na sab og dalaygon nga teamwork aron langkaton ang ikaduha nilang daog sud sa tulo ka duwa nga sulagma kaayong batok sa laing koponan gikan sa Iligan.

Ang mga Oponganon miabli sa ilang kampanya pinaagi sa makapaisa'g balahibo nga kadaogan batok sa KSB Iligan Crusaders, 72-73, sa wala pa miyukbo sa Bukidnon Cowboys, 68-70, sa laing kulbahinam nga sangka niadtong Martes.

Si Al Odias mitali og 11 puntos samtang si Cid Jumao-as midugang og 10 puntos ug duha ka rebounds alang sa Chiefs, nga nakapuwersa og five-way tie sa liderato uban sa Consolacion Sarok Weavers, CDO Sealcor Kingfishers, Kapatagan Buffalos, ug Cowboys bitbit ang managsamang 2-1 win-loss records.

Mihimo sab og kasikas sila si Dave Paulo, Paul Llenes, Zaldy Dizon, Sam Melicor, ug  Reinhard Jumamoy alang sa Chiefs nga kontrolado kaayo ang duwa sukad mibuhot ngadto sa 34-27 nga labaw sa halftime.

Padayong gikastigo sa Chiefs ang Archangels sa ikatulong kuwarter, 25-15, aron inaton ang ilang bentaha ngadto sa 59-42 padung sa pinak nga 10 minutos sa aksiyon.

Si Paulo mitapos uban ang sayes puntos ug siyam ka rebounds samtang si Llenes mihipos sab og saye puntos apil na ang iyang 3-pointer nga nakahatag sa Chiefs sa kinadak-an nilang labaw nga 20 puntos, 62-42, sa nakaon nga nuybe segundos pa lamang sa katapusang kuwarter.

Sila si Dizon, Melicor, ug Jumamoy nagkumboya og 14 puntos, 15 ka rebounds, ug walo ka assists sa balanse kaayong ataki sa Chiefs.