Javier Ceramics, Basic Engineering sa finals
CEBU, Philippines — Midaog sa managlahing paagi ang Javier Ceramics ug Basic Engineering sa semifinals sa Summer League Basketball Tournament 2022 niadtong Domingo didto sa CEC gym, Cebu City. Ang Javier Ceramics wa'y kaluoy nga milubong sa Sir Nabz Food, 106-64 ug ang Basic Engineering mipukan sa Cocoroj Construction Supply, 79-71 aron mag-abot sa tagakay nga kampiyonato ning maong liga nga nahunong gumikan sa pandemiya duha ka tuig na ang nilabay, giorganisar nilang Joeffrey Banaag, Marvin Sillar, Al Kinkito ug Cesar Ramos.karong Domingo.
Si Marco Booker Panta nga maoy best player sa iyang 25 puntos ug 10 ka rebounds ang nangu sa Javier Ceramic, gisundan ni Kenn Rolf Nuñez nga adunay 23 puntos. Laing tulo ka players ang mirehistro og double figures sa Javier Ceramic ni team owner PJ Penera, kinsa wala makaduwa kay atua pa siya karon sa Canada.
Ang Sir Nabz Food gipangulohan ni Joshua Banaag pinaagi sa iyang 21 puntos, gisundan ni Paul Gesto nga adunay 12 puntos.
Sa laing bahin, gipangulohan sab ni Jessie Boy Sanchez ang Basic Engineering nga mipabuto og 22 puntos uban ang lima ka rebounds ug lima ka assists nga igo na kaayo alang kaniya aron tahuron isip best player of the game. Sila si Earl Sanchez ug Kenaz Balderas mitampo'g 21 ug 14 puntos matag usa. sa kadaogan sa Basic Engineering ni coach Rey Carlos.
Ang back-to-back baskets ni Earl Sanchez naghatag sa Basic Engineering og 76-71 nga bentaha sa nahabiling 2:05 sa duwa ug ang fastbreak ni JB Sanchez nagseguro sa kadaogan sa koponan.
Nangulo sa pilderong Cocoroj mao si Dan Cardenas nga mipabuhagay og 28 puntos, gisundan ni Rafraf Panares sa iyang 16 puntos.
Puntos matag usa Unang duwa:
Javier Ceramics (106) - Panta 25, kenn rolf Nunez 23, K. Sillar 21, Ihalas 14, Cempron 11, M. Sillar 6, Busmion 5,Aagustin 2.
Sir Nabz Food (64) - Josh Banaag 21, Gesto 12, Ramas 10, Vargas 10, Joe Banaag 10, Panoncillo 5, Delos Reyes 4, Casinillo 2
Ikaduhang duwa:
Basic Engineering (79) - JB Sanchez 22, Earl Sanchez 21, Balderas 14, Lumontad 9, A. Ravina 6, Geronca 5, M. Carlos 4, R. Carlos 2
Cocoroj (71) - D. Cardenas 28, Panares 16, R.Cardenas 8, Mata 8 , Romo 6, Oyao 5, Bautista 2, Tamase 2 — YRA
- Latest
