Pinay boxers nasa Thailand na

MANILA, Philippines — Nasa Bangkok, Thailand na ang national boxing team para sumailalim sa training camp bilang paghahanda sa 31st Southeast Asian Games sa Mayo sa Hanoi, Vietnam.

Nangunguna sa listahan si Tokyo Olympics silver medalist Nesthy Petecio kasama sina dating world champion at five-time SEA Games gold medalist Josie Gabuco (48kg), Aira Villegas at Mary Ic Sinadjan (51kg), Irish Magno (54kg), Maricel Dela Torre (57kg), Riza Pasuit (60kg) at Hergie Bacyadan (75kg).

Magpapartisipa rin ang women’s team sa Thailand Open International Boxing Tournament na gaganapin sa Phuket sa Abril 1 hanggang 10.

Sasalang sa training camp ang mga Pinay boxers sa Muak Klek na nasa dalawa hanggang tatlong oras na malayo sa Bangkok.

Matapos ang training camp sa Muak Klek, agad na tutulak ang koponan sa Phuket para sa Thailand Open.

Hindi sasalang si Petecio sa Thailand Open dahil mas nakasentro ang atensiyon nito sa SEA Games at World Championships.

Kasama lang ito sa Thailand para sumailalim sa training camp.