Pilipinas Super League ARQ Lapu-Lapu Chiefs nagpanikad mokumbati

CEBU, Philippines — Ang Lapu-Lapu City Chiefs nagpanikad nang mokumbati sa labing unang season sa Pilipinas Super League nga magsugod na tulo ka semana gikan karon.

Gipaluyohan sa ARQ Sports ni sportsman Jason Arquisola, ang Chiefs usa ka duha ka Cebu teams nga mopakita'g aksiyon sa Under 21 division sa labing bag-ong pro basketball league sa nasud nga gikatakdang mosikad karong Abril 1 didto sa Roxas, Zamboanga del Norte. Ang lain mao ang Consolacion Sarok Weavers ni coach Kareem Alocillo.

Si Lapu-Lapu head coach Roger Liston-Bergado nagkanayon nga ang paghashas og mga players nga anagayan morepresenta sa dakbayan usa ka malisud nga proseso mao nang ilang giseguro nga ensaktong klase sa mga magduduwa ang ilang gipangkuha.

"We formed our team by conducting tryouts in mainland Barangay's of Lapu-lapu, including the island barangays. We were able to trim down from more than 200 hopefuls to a 35-man pool. Then we selected 20 players for Team A, while the remaining 15 for our Team B lineup," padayag pa ni Bergado.

Midugang si Bergado nga wala silay mga bitoon isip usa ka barangay-based grassroots team apan iyang gipasalig nga ang iyang mga batos dunay igong katakos nga mamahimong usa ka lig-ong pouwersa sud sa korte.

"We commit to work hard and give our best during practices to form a strong team whose members are focused, disciplined and determined to win and give entertainment, joy and pride to our fans, sponsors and supporters," paambit pa ni Bergado, kanhi playing coach sa Indiana Aerospace University sa iyang panahon sa kolehiyo.

Si Bergado lumad gikan sa San Isidro sa San Francisco, isla sa Camotes apan anaa na karon nagpuyo sa Basak, Lapu-Lapu. Sakop siya sa Lapu-Lapu Selection niadtong 1990s sa wala pa siya mamahimong coach. Sukad niadtong 2005, siya maoy coach sa Basak Tigers nga nakasakmit og pipila ka mga kampiyonato sa seniors ug 40-above categories sa wala pa gihunon sa pandemiya ang tanang mga duwa.

Sa Super League, mas bug-at nga tahas ang sagubangon sa 50-anyos nga si Bergado. Apan andam siya nga atubangon ang malisud nga hagit nga nag-atang kaniya sa unahan ilabi kay kay alang kini sa usa ka mahinungdanong kawsa.

"We want to guide and help our players hone their talents so they could qualify as varsity players in different colleges and universities in the future," dason pa ni Bergado. "One way to achieve that is to expose our players to big leagues such as the Pilipinas Super League and eventually win championships."

Ang mga sakop sa ARQ Lapu-Lapu Chiefs ubos ni coach Bergado mao sila si Jeco Bancale, Mitch Almodal, Johndel Bagaporo, Jade Mata, Reinhard Jumamoy, Jose Zaldy Dizon, Paul Llenes, Yuan Ochea, Jeremi Vidal, Dave Paulo, Sam Melicor, Al Odias, Frank Gabunada,  Simon Ducusin, Nelson Duallo, Vince Sestoso, Joshua Ompad, Cid Jumao-as, Brian Santillan, ug James Lapasa.