Harden misidlak sa iyang home debut sa Sixers
CEBU, Philippines — Si James Harden padayon nga mihimo og impresyon, ning higayona sa iyang home debut uban sa Philadelphia human siya hapit maka-triple double sa dihang gikastigo sa 76ers ang New York Knicks, 123-108, sa NBA kagahapon didto sa Wells Fargo Center sa Philadelphia, Pennsylvania.
Miduwa sa unang higayon didto sa ilang korte isip usa ka Sixer, ang two-time NBA scoring champion nga si Harden nagpakitang gilas atubangan sa bagang panon sa ilang fans uban ang 26 puntos, siyam ka rebounds ug siyam sab ka assists.
Si Harden maoy responsable pagpabangon sa Sixers human sila malubong og 16 puntos sa first half.
Luyo sa pagpanginit ni Harden, gilabhan sa Sixers ang Knicks sa ikatulong kuwarter, 38-19, nga nahimong instrumento sa dalaygon nilang James Hardenpagbalitok.
Gawas ni Harden, mihimo sab og kasikas sila si Joel Embiid ug Tyrese Maxey sa Sixers. Si Embiid mipupo og 27 puntos ug 12 ka rebounds samtang si Maxey mikadlit og 25 puntos.
Sa laing aksiyon, gipukan sa Indiana Pacers ang Orlando Magic sa overtime, 122-114.
Si Malcolm Brogdon maoy nangu sa Pacers bitbit ang 31 puntos, 11 ka rebounds, walo ka assists ug duha ka steals.
Mikuha sab og atensiyon si Terry Rozier uban ang 29 puntos sa dihang gilampaso sa Charlotte Hornets ang Cleveland Cavaliers, 119-98.
- Latest
