Kalandrakas sa NBA

Nets mi-trade ni Harden sa 76ers alang ni Simmons

CEBU, Philippines — Gi-trade sa Brooklyn Nets si three-time scoring champion James Harden ngadto sa Philadelphia 76ers alang ni Ben Simmons ug uban pa sa makapakurat nga NBA deal kagahapong adlawa.

Gitaho sa ESPN ug The Athletic nga malabni sa Sixers sila si Harden  ug Paul Millsap hulip nilang Simmons, Seth Curry, Andre Drummond ug duha ka first-round draft picks sa umaabot.

Si Harden, ang 2018 MVP, napunta sa Nets human gi-trade sa Houston Rockets niadtong Enero 2021. Miporma siya og superteam uban nilang Kevin Durant ug Kyrie Irving sa wala pa gilabay sa Brooklyn ngadto sa Philadelphia.

Sa poder sa Sixers, si Harden makig-alyansa ni Joel Embiid, ang leading scorer ning NBA season uban ang average nga 29.4 puntos matag duwa. Seguradong bangis ang ilang kombinasyon kay impresibo man sab ang mga numero ni Harden nga 22.5 puntos, 10.2 assists, ug 8.0 rebounds matag duwa.

Sa kasamtangan, ang 76ers nagbitbit og 32-22 record, labaw og tulo ka duwa sa Nets nga dunay 29-25 nga  baraha.

Nakamina sab hinoon og bulawan ang Nets pinaagi sa 25-anyos nga si Simmons, ang 2018 Rookie of the Year ug All-Star sa mosunod nga tulo ka seasons. 

Sa upat niya ka tuig sa liga, ang Australyanong guard mipatak og 15.9 puntos, 8.1 rebounds, ug 7.7 assists. Apan wala pa siya makaduwa ning season tungod ka nakabangi ang iyang team nga dugay na niyang gustong layasan.

Sa lain pang mga kasikas sa NBA trade deadline kagahapon, gipadala sa Dallas si Latvian center Kristaps Porzingis ug usa ka second-round draft pick ngadto sa Washington Wizards sa usa ka kasabotan nga naghatud nilang Spencer Dinwiddie ug Latvian forward Davis Bertans ngadto sa Mavericks.

Ang Wizards mi-trade sab sa sentrong si Montrezl Harrell ngadto sa Charlotte alang nila ni  Ish Smith ug Vernon Carey.

Ang sentro nga si Serge Ibaka napunta sa defending champion Milwaukee Bucks isip kabahin sa four-team trade nga naghatud ni Marvin Bagley sa Detroit Pistons, Rodney Hood ug Semi Ojeleye sa Los Angeles Clippers ug  Donte DiVincenzo ug Josh Jackson sa Sacramento Kings. Wala sab mag-alkansi ang Phoenix Suns nga mikuha og balik ni forward Torrey Craig sa usa ka trade uban sa Indiana Pacers hulip nilang Jalen Smith ug usa ka second-round pick. Gidugang sab sa Suns sa ilang lineup si Aaron Holiday nga ilang nalabni gikan sa Washington pinaagi sa pinansiyal nga konsiderasyon. Samtang ang Boston Celtics mi-trade ni Dennis Schroeder ngadto sa Houston Rockets uban ni Enes Freedom ug Bruno Fernando alang ni Daniel Theis. I-waive hinoon sa Rockets si Freedom. Nakuha sab sa Boston si San Antonio guard Derrick White.

Ang Spurs nakigbinayloay sab og players uban Toronto. Ilang nabitad si Slovenian guard Goran Dragic ug 2022 first-round pick puli ni Thaddeus Young, Drew Eubanks, ug second-round pick.