A2K, Team Tayud nanghawod sa Toledo MTB race

CEBU, Philippines — Ang A2K sa Balamban ug Team Tayud sa Compostela maoy midominar sa tagsa-tagsa nila ka dibisyon sa 1st Tubod Loop MTB Relay Challenge didto sa Mantuhac diversion road sa Tubod, dakbayan sa Toledo ning bag-ohay pa lamang.

Gilangkoban og mga beteranong seklista nga sila si Francis Hernando, Rio Hernando ug Romy Mayordomo, ang A2K milugwa nga kampiyon sa Barkada Category 2 alang sa 19-30 age group. Ang Team Lidoy, nga gikan sab sa Balamban, mipahiluna sa ikaduhang dapit ug gisundan kini sa TRT Luray.

Misaler sab ang teamwork ug stratehiya nilang Kaizer Randolf Lee, Andrew Montebon ug Kent Ian Lawas sa Team Tayud hinungdan nga ilang gisakmit ang titulo sa Category 1 alang sa mga riders nga nag-edad og 16 ngadto sa 18 anyos. Mi-okupar sa ikaduha ug ikatulong luna ang Cael’s Pedal sa Argao ug ang Awihao Cycling Community Club sa Toledo.

Ang Classic Monkeys nilang Carl Abajo, Jhonrey Vaflor, ug Mark Russel Basalo miwani sa Team Pacquiao aron angkonon ang unang puwesto sa all-Toledo category diin ang Watchmytin maoy na-3rd.

Sa all-Tubod class, sila si Romar Tigtig, Rofer Cereno, ug Jason Ponting sa Team Kapscamp mibuntog sa Team Alfonso aron birahon ang korona samtang ang Legends nalandig sa ikatulong dapit.