Doc Yong nakadawat na's kopya sa resolusyon

Pasidungog gikan sa kongreso

CEBU, Philippines — Ang beteranong runner ug tinamod nga eye surgeon nga si Dr. Potenciano “Yong”” Larrazabal III nakadawat na sa opisyal nga kopya sa House resolution nga mipahalipay ug midayeg kaniya isip labing unang Pinoy nga nakahuman sa malisud nga World Marathon Challenge nga gipahigayon niadtong Pebrero 7-13, 2020.

Si Cebu Fifth District Representative Vincent Franco “Duke” Frasco, nga usa sab ka sports enthusiast, personal nga minutol ni Larrazabal sa kopya sa resolusyon kagahapon, Pebrero 8.

Si Frasco maoy nag-sponsor sa Resolution No. 203 nga gi-adopt sa House of Representatives niadtong Agosto 31, 2021 ug gipirmahan nilang Speaker Lord Allan Jay Q. Velasco ug House Secretary General Mark Llandro L. Mendoza. Si Larrazabal midalit sa mainiton niyang pasalamat ngadto ni Frasco ug sa 18th Congress sa pagpasar nila sa resolusyon nga makapadasig kaniya og samot nga ipadayon ang iyang adbokasiya nga palamboon ang sports nga duol sa iyang dughan. Nagpahidumdum sab kini sa tanan nga dunay mga lider nga nagpaluyo sa tanang matang sa paugnat sa kusog sa nasud.

“It has been two years, but I will always be grateful to everyone who believed in me. So, this commendation is not mine alone. I share this with my family, friends, and supporters who helped me achieve my goal and with my beloved Cebu,” suwat pa ni Larrazabal sa iyang Facebook post.

“You’re welcome, Doc. Cebu and the Cebuanos are proud of you!” tubag pa ni Frasco. Ang World Marathon Challenge naglangkob og pito ka marathon sa pito ka kontinente sud sa pito ka adlaw.

Si Larrazabal mikulit og kasaysayan isip labing unang Pinoy nga nahimong miyembro sa Seven Continents Marathon Club human gikumpleto ang makutas nga lumba nga sagunson gipahigayon didto sa Antarctica, Africa, Australia, Asia, Europe, South America ug North America.