Booker bida na sab sa Suns
CEBU, Philippines — Si Devin Booker mipaulbo og 38 puntos sa dihang gitumba sa Phoenix Suns ang Chicago Bulls, 127-124, sa NBA kagahapon didto sa United Center sa Chicago, Illinois.
Ang beteranong guard nga si Chris Paul midugang og 19 puntos ug 11 ka assists samtang si Jae Crowder mipupo og 10 puntos, 10 ka rebounds ug unom ka assists alang sa Suns nga midaog sa ika-13 nga higayon sa miagi nilang 14 ka duwa.
Mihimo sab og kasikas sila si JaVale McGee, Mikal Bridges, ug Deandre Ayton nga nagkumboya og 44 puntos alang sa Suns.
Sila si DeMar DeRozan ug Zach LaVine nagkumbinar og 70 puntos apan parehong nangahoyhoy ang abaga gumikan kay ang Bulls naparot sa ikatulong higayon sa katapusan nilang upat ka duwa.
Sa laing duwa, si Klay Thompson mikadlit og 21 puntos alang sa Golden State Warriors, nga miposte sa ikasiyam nilang sagunson nga daog human gibugha ang Oklahoma City Thunder, 110-98.
Wala sab magpabitin si Stephen Curry nga mihipos og 18 puntos, 10 ka assists ug siyam ka rebounds alang sa Warriors.
Sa uban pang mga resulta, sila si Pascal Siakam ug Gary Trent parehong mi-iskor og 24 puntos
sa dihang gipayaka sa Toronto Raptors ang Charlotte Hornets, 116-101, samtang si Donovan Mitchell mipatuasik og 32 puntos sa dihang gipatikalbong sa Utah Jazz ang New York Knicks, 113-104.
- Latest