Beermen duna say bag-ong import

CEBU, Philippines — Gawas sa Blackwater Bossing, ang San Miguel Beermen moparada sab og bag-ong import sa pagsugod og balik sa PBA Governors'  Cup karong Pebrero 11 didto sa Smart Araneta Coliseum. Kini mao si Orlando Johnson, nga maoy mohulip sa dapit ni Brandon Brown. Ang 32-anyos nga si Johnson naabot na sa nasud sa wala pa ang Bag-Ong Tuig apan bag-ohay pa lamang kini nakapraktis og todo uban sa iyang mga teammates.

"So ang tagal din niyang hindi nakapag-laro, nakapag-practice, kaya yung una niyang labas para siyang nakawala sa hawla,"matud pa ni SMB team manager Gee Abanilla.

Si Johnson beterano sa NBA diin siya nakaduwa uban sa Indiana Pacers, Sacramento Kings, New Orleans Pelicans, ug Phoenix Suns.

Nahimo siyang import sa Barangay Ginebra Kings niadtong 2015 PBA season diin siya mi-average og 33.7 puntos ug 11.3 rebounds matag duwa. Nakaabot sila sa playoffs apan gitagak ra sab sa Alaska Aces.

Uban sa SMB, lain na sab nga misyon ang sagubangon ni Johnson ilabi na kay dili basta-basta ang iyang hulipan nga si Brown, nga mipatak og 23.4 puntos, 12.6 rebounds, ug 5.0 assists matag duwa aron giyahan ang Beermen ngadto sa 3-2 record sa wala pa mahunong ang aksiyon sa liga.