Harden, Durant migiya sa Nets batok Knicks

CEBU, Philippines — Mikuha og atensiyon sila si James Harden ug Kevin Durant apan ang duha ka free throws ni James Johnson sa pinal nga 2.2 segundos maoy naghatud sa Brooklyn Nets ngadto sa 112-110 nga kadaogan batok sa silingan niining New York Knicks sa NBA kagahapon didto sa sa Barclays Center sa Brooklyn, New York. Si Harden mitapos uban ang 34 puntos, 10 ka rebounds, ug walo ka assists samtang si Durant nanginit human sa mabugnaw nga sinugdanan aron pagkimada og 27 puntos ug siya ka assists. Bangis kaayo si Durant nga mibubo og 11 puntos sa katapusang 5:45 sa duwa.

Bida sab hinuon si Johnson nga kalmado kaayong mipasud sa duha ka krusyal niyang free throws aron pagsalbar sa Nets.

Ang Nets naglabaw og 16 puntos sa nahibiling tres minutos sa ikatulong kuwarter ug igo lamang nakasikti ang Knicks ngadto sa kuwatro puntos, 84-84, padung ngadto sa katapusang 12 minutos sa aksiyon.

Si Alec Burks dunay season-high 25 puntos apan naminghoy sa habig sa Knicks. Si Julius Randle midugang og 24 puntos, siyam ka rebounds ug walo ka assists sa pilderong kawsa.

Didto sa Toronto, si Jaren Jackson Jr. mihipos og 25 puntos, si Desmond Bane mi-iskor og 23 samtang si Dillon Brooks mitampo og 17 punts sa dihang gimakmak sa Memphis Grizzlies ang nagkagidlay nga Toronto Raptors, 98-91.

Ang Memphis nakasagunson og duha ka daog bisan og wala ang leading scorer nilang si Ja Morant nga dunay angol sa wala niining tuhod.   

Si Pascal Siakam mipupo og 20 puntos samtang sila si Scottie Barnes ug Fred VanVleet nagkumboya og 34 puntos alang sa Raptors nga nasugamak sa ikatulo nilang sunod-sunod nga pilde.