PBA imports ‘di apektado ng bagong travel restrictions
MANILA, Philippines — Hindi maaapektuhan ang mga darating na PBA imports ng bagong health protocols na ipinatutupad ng Inter-Agency Task Force (IATF).
Naglatag ng mas mahigpit na patakaran ang IATF sa lahat ng foreigners na darating sa bansa simula ngayong araw dahil sa bagong COVID-19 Omicron variant na natuklasan sa South Africa.
Sa kasalukuyan, tanging 10 imports pa lamang ang dumating sa bansa.
Habang sinusulat ang balitang ito, wala pa sina Justin Brownlee ng Barangay Ginebra at Tony Bishop ng Meralco.
Ngunit tiniyak ni PBA commissioner Willie Marcial na makakapasok ng bansa ang dalawa dahil nabigyan ito ng 9-A Visa at special permit ng Department of Foreign Affairs.
Nakatakda sanang dumating si Brownlee noong Nobyembre 25 subalit naatras ito dahil sa pagkumpleto ng mga requirements.
Ito rin ang naging dahilan ng pagkakaantala ng pagdating ni Bishop na natanggap lamang ang kanyang visa noong Nobyembre 29.
- Latest