'Dayon-dayon' volleyball sa Casili karong Domingo
CEBU, Philippines — Andam na ang tanan alang sa Casili Dayon-Dayon Voleyball Tournament karong Domingo, Nobiyembre 28, didto sa Las Vegas court sa Barangay Casili, lungsod sa Consolacion amihanang bahin sa Sugbu.
Walo ka teams ang magkumbati ning usa ka adlaw nga torneyo nga gituyo aron pagdugang og lamas sa tinuig nga pista sa Casili agi’g pagtamod sa minahal nilang patrona, ang Our Lady of Fatima.
Moduwa sila og single round robin diin ang top 4 mo-abante sa crossover semifinals.Ang mga manaog mag-abot sa tinagakay nga kampiyonato.
Ang makampiyon mobulsa og P5,000 samtang ang mopahiluna sa ikaduha ngadto sa ikalimang dapit makadawat og P3,000, P2,000, ug P1,000.
Sa dili pa ang kompetisyon, dunay exhibition match tali sa Team Consolacion nilang Roderick Arenasa, Regie Cavan ug Jumar Ruma, ug Team Cebu City nilamng Jubert Barsenas, Roldan Alcantara,ug Felix Miro.
Gi-organisa nilang Steve Alilin, Regie Cavan ug Marisa Cavan inabagan nilang Casili Brgy. Capt. Edesio Alilin ug Sangguniang Kabataan (SK) chairman John Carlo Tigue, ang maong kalihukan gipaluyohan nilang Ako Bisaya partylist Rep. Sonny Lagon ug Consolacion Mayor Joannes “Joyjoy” P. Alegado.
- Latest