CHED maghihigpit sa training ng student-athletes
MANILA, Philippines — Pinayagan na ng Commission on Higher Education (CHED) ang pagbabalik-ensayo ng mga student-athletes upang paghandaan ang nalalapit na pagbubukas ng UAAP at NCAA sa susunod na taon.
Ngunit hindi basta-basta makakapagsimula sa training ang mga student-athletes dahil kailangan nitong makumpleto muna ang mga requirements para masigurong ligtas ang lahat.
May panuntunang inilatag ang CHED na kailangang sundin sa training ng mga varsity teams.
Kailangang magsumite ng mga unibersidad ng letter of intent sa CHED kasama ang ilang dokumento para masimulan ang ensayo.
Kasama rin sa requirements ang pagkakaroon ng health declaration forms ng student-athletes, coaches, trainers, staff at officials sa tuwing magsasagawa ang bawat team ng training.
Kailangan din na makakuha muna ang mga unibersidad ng approval mula sa local government unit na nakakasakop sa kanilang training venue bago simulan ang ensayo.
Daraan din sa inspeksiyon ng CHED ang lahat ng pasilidad na gagamitin sa training upang masiguro na nasa tama ang lahat at sumusunod na minimum health protocols. Sasailalim din sa swab test ang lahat ng magpapartisipa sa training camp kasunod ang 14-day quarantine bago magsimula ang ensayo.
Sa oras na makumpleto ang lahat ng requirements, saka lamang magbibigay ng go signal ang CHED para masimulan na ang ensayo.
- Latest
