Biado kampiyon na sab
CEBU, Philippines — Dul-an sa duha ka bulan sukad siya naghari sa US Open 9-Ball Championship, ang Pinoy'ng tirador sa bilyaran nga si Carlo Biado milugwa na sab nga kampiyon.
Kini human gipilde ni Biado ang kababayan niining si Jordan Banares, 13-6, sa ilang all-Pinoy finals aron sakmiton ang titulo sa Abu Dhabi Open 9-Ball Championship nga nahuman sayo kagahapon sa buntag didto sa Power Break Billiard Hall sa Abu Dhabi, United Arab Emirates.
“I’m very happy to win again, especially in an international tournament like this Abu Dhabi Open 9-Ball Championship. Maagang Pasko ito," matud pa ni Biado.
Gitapos sa 2017 World 9-Ball champion ang torneyo nga way pilde. Iyang gipangbuntog sila si Mohamad Eiljeffrey sa UAE, 9-0, ug Arnel Bautista, 9-7, sa sayong mga hugna.
Human niini, gipaksit ni Biado sila si Venancio Tanio (11-4), Roland Garcia (11-5), ug Harry Vergara (11-8) aron pag-abante sa finals diin iyang gikasangka si Banares, nga mitagak ni Bautista sa semis, 11-7. Gawas nga gibira ang korona, si Biado mibulsa sab og 20,000 AED (P272,800) nga ganting salapi samtang si Banares nakadawat og 10,000 AED (P136,400).
Ang kalamposan ni Biado sa Abu Dhabi naabot human iyang gidominar ang US Open Pool Championship didto sa Atlantic City, New Jersey niadtong Septiembre 19. Siya maoy ikaduha pa lamang nga Pinoy nga nanghawod sa prestiyosong torneyo sunod ni Efren "Bata" Reyes nga nakampiyon niadto pang 1994.
- Latest
