Biado kampeon sa Abu Dhabi Open

MANILA, Philippines — Mas lalo pang pinaningning ni Carlo Biado ang taong ito matapos idagdag ang korona ng Abu Dhabi Open 9-Ball Championship sa kanyang koleksiyon.

Nagawa ito ni Biado matapos igupo si Jordan Banares sa bendisyon ng 13-6 panalo sa all-Filipino championship showdown kahapon sa Power Break Billiard Hall sa Abu Dhabi, United Arab Emirates.

Naging sandalan ni Biado ang karanasan nito para mabilis na maigupo ang kanyang kababayang kalaban.

Nadagdagan na naman ang kaban ni Biado dahil iuuwi nito ang tumataginting na AED 20,000 o katumbas ng mahigit P270,000 premyo. “Maagang Christmas gift ito,” aniya.

Hindi naman uuwing luhaan si Banares na nagkamit ng AED 10,000 (mahigit P130,000) na runner-up purse.

Bago makapasok sa finals, pinataob ni Biado sina Mohamad Eiljeffrey sa first round (9-0), Arnel Bautista sa second round (9-7), Venancio Tanio sa third round (11-4), Ronald Garcia sa quarterfinals (11-5) at Harry Vergara sa semifinals (11-8).

Ito ang ikatlong korona ni Biado sa taong ito. Noong Setyembre, gumawa ng ingay si Biado nang pagharian nito ang prestihiyosong US Open 9-Ball Cham-pionship sa Atlantic City, New Jersey para maibulsa ang $50,000 papremyo o P2.5 milyong top prize.

Nagkampeon din si Biado sa 3rd Cajun Coast Classic 9-Ball Division noong Mayo sa Morgan City, Louisianna, at sa 8th Annual Big Tyme Classic One Pocket noong Hunyo sa Spring, Texas.